វេទិកាអាយស៊ីធី និងឌីជីថលកម្ពុជា លើកទី៧៖ ជំរុញចំណេះដឹង និងការសហការ
វេទិកាអាយស៊ីធី និងឌីជីថលកម្ពុជា លើកទី៧ ឬហៅកាត់ថា CamIDF លើកទី៧ ដែលប្រារព្ធឡើងនៅថ្ងៃទី២៧ ខែមិថុនា ឆ្នាំ២០២៤ បានប្រមូលផ្តុំអ្នកជំនាញ អ្នកចូលចិត្ត និងអ្នកពាក់ព័ន្ធទៅលើវិស័យនេះ ដើម្បីពិភាក្សាអំពីទិដ្ឋភាពសំខាន់ៗនៃព័ត៌មាន និងទំនាក់ទំនងបច្ចេកវិទ្យា (ICT) ក្នុងប្រទេសកម្ពុជា។ វេទិកានេះគឺជាផ្នែកនៃព្រឹត្តិការណ៍ធំមួយគឺ កម្ពុជា អាយស៊ីធីខែម ដែលផ្តោតលើប្រធានបទសំខាន់ៗចំនួនបីរួមមាន៖ សន្តិសុខសាយប័រ ទិន្នន័យបើកទូលាយ និងការនិទានរឿងដោយប្រើប្រាស់ទិន្នន័យ។ ព្រឹត្តិការណ៍នេះរៀបចំដោយអង្គការទិន្នន័យអំពីការអភិវឌ្ឍ (អូឌីស៊ី) រួមជាមួយនឹងការគាំទ្រពីមជ្ឈមណ្ឌលសម្រាប់សហគ្រាសឯកជនអន្តរជាតិ (CIPE) ក្នុងគោលបំណងផ្តល់ជូនប្រជាជនកម្ពុជានូវចំណេះដឹង និងឧបករណ៍ចាំបាច់សម្រាប់ប្រើប្រាស់ក្នុងទិដ្ឋភាពឌីជីថលដែលកំពុងតែវិវត្តទៅមុខ។
សុន្ទរកថាបើកកម្មវិធីដោយ លោក ធី ទ្រី នាយកប្រតិបត្តិរបស់អូឌីស៊ី
លោក ធី ទ្រី បានថ្លែងសុន្ទរកថាបើកកម្មវិធី ដើម្បីស្វាគមន៍អ្នកចូលរួម និងលើកឡើងពីសារៈសំខាន់នៃវេទិកានេះផ្សារភ្ជាប់ជាមួយកម្មវិធី អាយស៊ីធីខែម។ លោកបានសង្កត់ធ្ងន់ថា វេទិកាដែលធ្វើឡើងជារៀងរាល់ត្រីមាសនេះ គ្របដណ្តប់លើប្រធានបទចម្រុះដែលទាក់ទងនឹងអាយស៊ីធី និងសេដ្ឋកិច្ចឌីជីថល រួមទាំងក្របខ័ណ្ឌសង្គមផងដែរ។ លោកបានលើកទឹកចិត្តឱ្យអ្នកចូលរួមចុះឈ្មោះនៅលើ camidf.net ដែលជាវេទិកាមួយដែលត្រូវបានបង្កើតឡើងសម្រាប់ការពិភាក្សាអំពីបញ្ហាទាក់ទងនឹងអាយស៊ីធី និងការចែករំលែកព័ត៌មាន។ លោក ទ្រី ក៏បានលើកឡើងពីអត្ថប្រយោជន៍នៃសមាជិកភាពវេទិកាដែលរួមមាន ការផ្តល់ជំនួយក្នុងការធ្វើដំណើរ ដើម្បីជួយឱ្យសមាជិកបានចូលរួមក្នុងវេទិកាអភិបាលកិច្ចអ៊ិនធឺណិតនៅក្យូតុ (IGF) ឆ្នាំ២០២៣ ជាដើម។ លោកក៏បានលើកឡើងពីការប្តេជ្ញាចិត្តរបស់អូឌីស៊ីក្នុងការធ្វើជាអ្នករៀបចំនៃ កម្ពុជា អាយស៊ីធីខែម ឆ្នាំ២០២៤ ផងដែរ។ វេទិកាឌីជីថលនេះ ក៏ស្របនឹង អាទិភាពរបស់រាជរដ្ឋាភិបាលកម្ពុជាក្នុងការអនុវត្តយុទ្ធសាស្ត្របញ្ចកោណដំណាក់កាលទី១ដូចគ្នា។
របៀបវារៈនៃកម្មវិធី ក៏មានការពិភាក្សាលើសេចក្តីព្រាងច្បាប់ស្តីពីឧក្រិដ្ឋកម្មតាមអ៊ីនធឺណិត ដោយស្វែងរកការចូលរួមពីភាគីពាក់ព័ន្ធនានា រួមទាំងតំណាងមកពីវិស័យឯកជន សហគ្រាសធុនតូច និងមធ្យមផងដែរ។ ការពិភាក្សាទាំងនេះមានគោលបំណងផ្តល់នូវការយល់ដឹងយ៉ាង ទូលំទូលាយអំពីបញ្ហាដូចជាការការពារឯកជនភាព និងតាមអ៊ីនធឺណិតជាដើម។
ក្នុងនោះក៏មានការធ្វើបទបង្ហាញស្តីពីការវិនិយោគបរទេសនៅកម្ពុជាដោយលោក Owen Tremblay ដែលជាអ្នកហាត់ការអន្តរជាតិមកពីសាលាច្បាប់ William and Mary នៅសហរដ្ឋអាមេរិកផងដែរ។
សេចក្តីព្រាងច្បាប់ស្តីពីឧក្រិដ្ឋកម្មតាមអ៊ីនធឺណិតនៅកម្ពុជា៖ បកស្រាយដោយ លោក ង៉ែត ម៉ូសេ
លោក ម៉ូសេ បានដឹកនាំការប្រជុំលម្អិតលើសេចក្តីព្រាងច្បាប់ស្តីពីឧក្រិដ្ឋកម្មតាមអ៊ីនធឺណិតនៅកម្ពុជា ដោយផ្ដោតលើចំណុចសំខាន់ៗចំនួនបួនរួមមាន៖
• ច្បាប់ឧក្រិដ្ឋកម្មតាមអ៊ីនធឺណិតសកល
• ពេលវេលានៃសេចក្តីព្រាងច្បាប់របស់កម្ពុជា
• សេចក្តីព្រាងច្បាប់បច្ចុប្បន្ន
• កង្វល់ និងការឆ្លើយតបដែលទាក់ទងនឹងវា
លោកបានគូសបញ្ជាក់ថា មានតែ ៤% ប៉ុណ្ណោះនៃប្រទេសនៅទូទាំងពិភពលោក រួមទាំងកម្ពុជាផងដែរ ដែលមិនទាន់បានអនុម័តសេចក្តីព្រាងច្បាប់ស្តីពីឧក្រិដ្ឋកម្មតាមអ៊ីនធឺណិត។ លោកបានគូសបញ្ជាក់ពីការចូលរួមរបស់ភាគីពាក់ព័ន្ធផ្សេងៗក្នុងការតាក់តែងច្បាប់នេះ រួមមានវិស័យឯកជន សង្គមស៊ីវិល និងសហគ្រាសធុនតូច និងមធ្យមជាដើម។
កង្វល់ និងការឆ្លើយតបចំពោះសេចក្តីព្រាងច្បាប់
សាធារណជនបានសម្តែងការព្រួយបារម្ភអំពីសេចក្តីព្រាងច្បាប់នេះ ជាពិសេសទាក់ទងនឹងវិសាលភាព និងសក្តានុពលរបស់វា ក្នុងការរឹតបន្តឹងបន្ថែមទៀតនូវសេរីភាពនៃព័ត៌មាន និងការបញ្ចេញមតិ ដោយសារតែពាក្យគន្លឹះសំខាន់ៗដែលបានកំណត់មិនច្បាស់លាស់។ វាក៏មានសំណួរអំពីរបៀបដែលទិន្នន័យផ្ទាល់ខ្លួនរបស់អ្នកប្រើប្រាស់នឹងត្រូវរក្សាទុក និងការពារផងដែរ។ សិក្ខាសាលាពិគ្រោះយោបល់សាធារណៈនានាបានស្នើសុំពេលវេលាបន្ថែមទៀតសម្រាប់ការពិភាក្សា និងផ្តល់សំឡេងឱ្យកាន់តែច្រើនដល់វិស័យឯកជន និងសង្គមស៊ីវិល។ ការព្រួយបារម្ភជាក់លាក់ពីក្រុមទាំងនេះ រួមជាមួយនឹងការឆ្លើយតបរបស់រដ្ឋាភិបាលក៏បានយកមកពិភាក្សាដូចគ្នា។
ការវិនិយោគបរទេសនៅកម្ពុជា៖ បទបង្ហាញដោយ លោក Owen Tremblay
បទបង្ហាញរបស់លោក Owen ស្តីពីការវិនិយោគបរទេសបានផ្តល់នូវទិដ្ឋភាពទូទៅនៃការរីកចម្រើនយ៉ាងឆាប់រហ័សរបស់ប្រទេសកម្ពុជាក្នុងរយៈពេលពីរទសវត្សរ៍កន្លងមកនេះ។ លោកបានលើកឡើងពីទិដ្ឋភាពផ្សេងៗនៃការវិនិយោគបរទេស រួមទាំងហិរញ្ញវត្ថុ ការវិនិយោគរបស់ចិន និងការវិនិយោគរបស់សហរដ្ឋអាមេរិក ក៏ដូចជាសក្ដានុពលនៃការនាំចូល និងនាំចេញ។
លោកបានផ្តោតជាពិសេសលើវិស័យអាយស៊ីធី ដោយរៀបរាប់លម្អិតអំពីការអភិវឌ្ឍក្នុងវិស័យទូរគមនាគមន៍ ខ្សែកាបក្រោមសមុទ្រសម្រាប់ការតភ្ជាប់អ៊ីនធឺណិត និងទូរគមនាគមន៍ និងការរីកចម្រើនផ្នែកបច្ចេកវិទ្យាផ្សេងទៀត។ ដោយប្រើវិធានការអាយស៊ីធី សូចនាករ និងលិបិក្រមផ្សេងៗ លោកបានបង្ហាញពីស្ថានភាពបច្ចុប្បន្ននៃអាយស៊ីធី និងការអភិវឌ្ឍបច្ចេកវិទ្យារបស់កម្ពុជា ដោយកត់សម្គាល់ថាប្រទេសនេះនៅតែប្រឈមមុខនឹងបញ្ហាក្នុងការតាមទាន់ស្តង់ដារអន្តរជាតិ។ គាត់ក៏បានពិភាក្សាអំពីផលប៉ះពាល់នៃការរីកចម្រើនយ៉ាងឆាប់រហ័សលើគោលការណ៍ឯកជនភាព ដែលជាប្រធានបទដែលកំពុងតែពាក់ព័ន្ធខ្លាំងនៅក្នុងយុគសម័យឌីជីថល។
សេចក្តីសន្និដ្ឋាន
វេទិកាអាយស៊ីធី និងឌីជីថលកម្ពុជាលើកទី៧ បានផ្តល់ការយល់ដឹងដ៏មានតម្លៃចំពោះទិដ្ឋភាពអាយស៊ីធីរបស់កម្ពុជា ដោយគូសបញ្ជាក់ពីសមិទ្ធផល និងបញ្ហាប្រឈមដែលកំពុងបន្ត។ ជាមួយនឹងកិច្ចខិតខំប្រឹងប្រែងជាបន្តបន្ទាប់ក្នុងការការពារទិន្នន័យ ឧក្រិដ្ឋកម្មតាមអ៊ីនធឺណិត សុវត្ថិភាពតាមអ៊ីនធឺណិត ទិន្នន័យបើកទូលាយ និងការនិទានរឿងដោយប្រើប្រាស់ទិន្នន័យ ហើយតាមរយៈការដោះស្រាយកង្វល់ទាក់ទងនឹងច្បាប់ស្តីពីឧក្រិដ្ឋកម្មតាមអ៊ីនធឺណិត និងការវិនិយោគបរទេស កម្ពុជាមានគោលបំណងជំរុញសង្គមឱ្យមានការយល់ដឹងកាន់តែច្រើន និងបម្រើប្រាស់ឌីជីថល។ វេទិកានេះបានធ្វើជាគំរូនៃស្មារតីសហការដែលចាំបាច់ ដើម្បីរុករកនូវភាពស្មុគស្មាញនៃយុគសម័យឌីជីថល និងបានគូសបញ្ជាក់ពីសារៈសំខាន់នៃការសន្ទនាដែលកំពុងបន្តក្នុងចំណោមភាគីពាក់ព័ន្ធទាំងអស់។
តាមរយៈតុល្យភាពការការពារទិន្នន័យ និងតម្រូវការសន្តិសុខឌីជីថលជាមួយនឹងការច្នៃប្រឌិត ជាពិសេសនៅក្នុងវិស័យឯកជន និងសហគ្រាសធុនតូច និងមធ្យម កម្ពុជាអាចធានាបាននូវកំណើន និងការអភិវឌ្ឍប្រកបដោយចីរភាពនៅក្នុងវិស័យអាយស៊ីធីរបស់ខ្លួន។
